Layihənin məqsədi nədir?
“Gələcəyini Qur!” Gəncliyə Dəstək Layihəsinin əsas məqsədi aztəminatlı ailələrdən olan yüksək bilik və bacarığa malik gənclərin həyatda uğur əldə etmələrinə dəstək və töhfə vermək və bununla Azərbaycan cəmiyyətinə yüksək intellekt və etik dəyərlərə malik sağlam düşüncəli gənclər qazandırmaqdır.
Korporativ Sosial Məsuliyyət nədir?
Korporativ Sosial Məsuliyyət cəmiyyətin və ətraf mühitin qorunmasına, eyni zamanda inkişaf etməsinə yönələn könüllü davranış mədəniyyətidir və biznes strukturlarının maraqlı tərəflərlə (icmalar, təşkilatlar, bələdiyyələr, təhsil və mədəniyyət ocaqları və s.) qarşılıqlı əlaqədə həyata keçirdiyi, davamlı inkişafa yönələn iqtisadi, ekoloji və sosial tədbirlərin ardıcıl sistemidir.
Şirkətlər layihəni və Azərbaycan gənclərini niyə dəstəkləyir?
“Gələcəyini Qur!” Layihəsinin sponsoru olan hər bir şirkət layihənin məqsədini aydın şəkildə başa düşərək bu məqsədə çatmaqda layihəyə yaxından dəstək olur. Eyni zamanda, layihəni yüksək göstəricilərlə başa vurmuş abituriyentlər bəzən bu şirkətlər üçün potensial işçi hesab oluna bilər.
Layihənin şərtləri nədir?
Layihəyə qəbul zamanı şagirdin ailəsinin sosial durumu və şagirdin müxtəlif fənlərdən bilik və ümumi intellekt səviyyəsi ilə yanaşı, həmçinin təhsil alma istək və həvəsi əsas meyarlar hesab olunur.
Layihədə kim iştirak edə bilər?
Təhsil almaq həvəsi və istəyi olan lakin maddi durumu buna mane olan aztəminatlı ailələrin 10-cu sinifdə təhsil alan şagirdləri bu layihədən yararlana bilər.
Mən 9-cu (11-ci) sinif şagirdiyəm – layihədə iştirak edə bilərəm?
Hazırda 10-cu sinifdə oxuyub 2022-ci ilin sentyabr ayında (yəni ki, 2022-2023-ci tədris ilində) 11-ci sinif şagirdi olacaqsınızsa – o zaman seçim prosesinə qoşula bilərsiniz. Əgər 9-cu sinifdə oxuyursunuzsa, növbəti il layihədə iştirak üçün müraciət edə bilərsiniz.
Mən V qrupa daxil olmaq istəyirəm – layihə V qrup ixtisaslarını əhatə edir?
Əfsuslar olsun ki, layihədən yalnız I, II, III və IV ixtisas qrupuna hazırlaşan abituriyentlər yararlana bilər.
Layihədə iştirak ödənişlidir?
Xeyr, layihədə iştirak tamamilə ödənişsizdir.
Layihədə iştirak etmək üçün nə etmək lazımdır?
Layihənin iştirakçısı olmaq istəyən hər bir namizəd öncəliklə qeydiyyatdan keçərək müraciət ərizəsini doldurmalıdır.
Layihənin niyə 5 seçim mərhələsi var?
Layihəyə seçim mərhələlərinin hər biri namizədin mövcud tələblərə uyğun olub-olmadığını müəyyənləşdirəcək şəkildə təyin olunub. Bu səbəbdən təyin olunan mərhələlər bu cavabları almaqda bizə kömək olur.
2-ci seçim mərhələsində (imtahan) hansı suallar olur?
Bu mərhələdə sizə verilən suallar orta məktəbdə keçdiyiniz dərslərdən əlavə olaraq, məntiqinizi və ümumi bilik səviyyənizi ölçmək üçün suallardan ibarət olan testlər şəklində təşkil olunur.
Müsahibələr kim tərəfdən keçirilir?
Müsahibələr layihənin idarə heyəti və işçi könüllülər tərəfindən keçirilir.
Müsahibədə hansı suallar verilir?
Müsahibə zamanı namizədə təhsil alma istək və həvəsi, qarşısına qoyduğu məqsədlər, ailənin sosial durumu və s. barədə suallar ünvanlanır.
Ailələrə səfərlər niyə təşkil olunur?
Layihə komandasının namizədlərin ailəsinə səfərində məqsəd həmin ailənin sosial durumunun hansı vəziyyətdə olmasını müəyyənləşdirmək və ailəylə daha yaxından tanış olmaq məqsədi daşıyır.
Dərslər necə təşkil olunur?
Layihə çərçivəsində dərslər DİM-in qəbul prosesinə uyğun olaraq “Kainat Tədris Mərkəzi”nin filiallarında həyata keçirilir.
Mən əlavə hazırlığa gedirəmsə, layihədə iştirak edə bilərəm?
Layihəyə qəbul şərtlərində bu barədə məlumat yer almadığına görə geri qaldığınız fənn və ya fənnlərdən əlavə hazırlığa getməniz sizin layihədə iştirakınıza maneə yaratmır.
Layihə vasitəsilə xaricdə təhsil ala bilərəm?
“Gələcəyini Qur!” Məzunlarının Assosiasiyasının nəzdində xaricdə təhsillə bağlı bir sıra təlimlər keçirilməsi planlaşdırılır. Təhsilinizi xaricdə davam etdirmək niyyətindəsinizsə, bu barədə ətraflı məlumatı həmin təlimlərdə ala biləcəksiniz.
Layihənin seçimləri haqqında məlumatı necə əldə edə bilərəm?
Seçim prosesi yaxınlaşan zaman bu barədə xəbəri məktəbinizə aid “WhatsApp” qruplarından, layihənin sosial media hesablarından və ya www.geleceyiniqur.az vebsaytımızdan əldə edə bilərsiniz.
Mən yalnız bir (iki) fəndən hazırlığa getmək istəyirəm – layihəyə qoşula bilərəm?
Məqsədimiz layihə iştirakçısı olan şagirdin imtahandan yüksək nəticə göstərməsi olduğu üçün bütün fənlərdən hazırlıq daha məqsədəuyğundur.
Layihəni bitirmiş gənclər işlə təmin olunur?
Xeyr. Layihə bu barədə heç bir öhdəlik daşımır.
Layihədə iştirak edən gənc pullu proqrama qəbul olsa, layihə onun təhsil haqqını ödəyəcək?
“Gələcəyini Qur!” Gəncliyə Dəstək Layihəsi ali təhsil almaq istəyən şagirdlərin universitetə qəbul olması üçün ödənişsiz abituriyent hazırlığı təşkil edir. Bu zaman şagirdlərdən gözləntimiz onların əlindən gələnin ən yaxşısını etməsi və ödənişsiz təhsil qazanmasıdır.
